संघीयता विरोधी बन्दया प्रतिकार
संघीयताया विरोध यासें राष्ट्रिय जनमोर्चां आव्हान याःगु बाग्मती अञ्चल बन्दया प्रतिकार याःगु दु । स्वनिगःया थीथी थासं नेवाःत नापं आदिवासी जनजातितय्सं मोटरसाइकल र्याली पिकयाः बन्दया प्रतिकार याःगु खः ।
नेवाः स्वायत्त राज्य मंकाः संघर्ष समितिया आव्हानय् येँया बसन्तपुली मुनाः मोटरसाइकल र्याली न्ह्याःगु खः । उगु र्यालीइ यलं वःगु जुलुसं नं ब्वति काःगु खः । बसन्तपुलीं न्ह्याःगु र्याली येँया दुनेया लागाः चाहिलाः रत्नपार्कय् थ्यंकाः छगू कोणसभाय् हिउगु खः ।
कोणसभायात सम्बोधन यानादिसें नेवाः स्वायत्त राज्य मंकाः संघर्ष समितिया वर्तमान नायः गजेन्द्र मानन्धर व आदिवासी जनजाति महासंघया महसचिव आङकाजी शेर्पां यदि राजनीतिक दलतय्सं पहिचान सहितया संघीयता स्वीकार मयासाः इमिगु अस्तित्व हे नामेट जुइगु ख्याच्वः बियादिल ।
कोणसभा लिपा आदिवासी जनजातित सहित हानं मोटरसाइकल र्याली न्ह्याःगु खः । उगु र्याली जमः, लैनचौर, सोह्रखुट्टे, सामाखुसी, गांगबु, गल्कोपाख, क्षेत्रपाटी, मरु, कालिमाटी जुयाः कलंकी थ्यंकाः क्वचाःगु खः ।
अथेहे बन्दया प्रतिकार कथं नेवाः जनाधिकार परिषद्ं यलय् व जातिय स्वशासनया निंतिं नायः फोरमं येँय् बन्द विफल यायेत आव्हान यासं प्रचारात्मक र्याली पिथन ।
बन्दया लिच्वः सामान्य
बन्दया हुनिं ताःहाकःगु दुरुया सवारी साधन चले मजूसां ट्याक्सी व मोटरसाकइल आपलं चलेजूगु खनेदु । अथेहे पसः नं अधिकांस चाःसां शिक्षण संस्था धाःसा बन्द जुल । बन्दया झ्वलय् जनमोर्चाया कार्यकर्तातय्सं गांगबुइ छगः बस व कालिकास्थानय् निगः ट्याक्सी तोडफोड यानाबिउगु खँ प्रहरीं धाःगु दु । प्रहरीया कथं जवर्जस्ती बन्द यायेत स्वःपिं निगू दर्जन बन्दकर्तातय्त नियन्त्रणय् काःगु दु ।
