मन्त्रिमण्डल विस्तार / निम्ह मन्त्रीपाखें सपथ ग्रहण
प्रधानमन्त्री डा. बाबुराम भट्टराईं न्हूपिं निम्ह मन्त्रीतय्त सपथ ग्रहण याकादीगु दु । खुक्वःगु खुसी मन्त्रिमण्डल विस्तार नापं वर्तमान मन्त्रिमण्डल आः तकया हे दकलय् तःधंगु मन्त्रिपरिषद् जूगु दु । आः मन्त्रिमण्डलय् ४९म्ह दुजः दुथ्याः ।
प्रधानमन्त्री भट्टराईं सोमवाः मधेशी जनअधिकार फोरम (गणतान्त्रिक)या राजकिशोर यादवयात सूचना व संचार व मोहमद अहमद शाहयात कृषि मन्त्री कथं सपथ ग्रहण याकादीगु खः । प्रधानमन्त्री भट्टराईं राष्ट्रपति डा. रामवरण यादवया उपस्थितिइ निम्ह मन्त्रीतय्त सपथ ग्रहण याकादीगु खः ।
फोरम गणतान्त्रिकया अध्यक्ष जेपी गुप्ता भ्रष्टाचारया मुद्दाय् जेल चालन जुइवं संचार मन्त्रीया पद रित्त जुयाच्वंगु खः । अथेहे कृषि मन्त्री नन्दनकुमार दत्तयात प्रधानमन्त्री बर्खास्त यायेवं उगु पद नं खाली जुयाच्वंगु खः ।
