मोटरसाइकल र्याली पिकयाः बन्दया प्रतिकार याइगु
संघीयताया विरोध यासें राष्ट्रिय जनमोर्चां चैत २७ गते आव्हान याःगु बग्मती अञ्चल बन्द नेवाःत नापं जनजातितय्सं प्रतिकार याइगु जूगु दु ।
स्वनिगःया थीथी थासं मोटरसाइकल र्याली पिकयाः संघीयता विरोधी बन्दया प्रतिकार याइगु जूगु दु । नेवाः स्वायत्त राज्य मंकाः संघर्ष समितिया ग्वसालय् येँ, यल व ख्वपं सोमवाः सुथय् हे मोटरसाइकल र्याली पिकाइगु खँ धाःगु दु । येँया बसन्तपुर, यलया मंगः व ख्वपय् मुनाः मोटरसाइकल र्याली पिकाइगु खँ ग्वसाः खलकं धाःगु दु ।
अथेहे नेवाःत बाहेक आदिवासी जनजातितय्सं नं बन्दया विरोध यासें मोटरसाइकल र्याली पिकाइगु ज्याझ्वः दयेकूगु दु । फुक्क थासं पिहांवःगु र्याली येँया रत्नपार्कस्थित शान्ति बाटिकाय् मुनाः हान मंकाः कथं थीथी थासय् चाहिलीगु ज्याझ्वः दु ।
