प्रचण्डं संविधान जारी मयायेगु षडयन्त्र यानाच्वन : ओली
नेकपा (एमाले) स्थायी समितिया दुजः केपी शर्मा ओलीं माओवादीया नायः पुष्पकमल दाहाल 'प्रचण्डं' संविधान जारी मयायेगु षडयन्त्रय् न्ह्यज्यानाच्वंगु द्वपं बियादीगु दु ।
शहिद रत्नकुमार वान्तवाया स्वीस्वक्वःगु स्मृति दिवसया झ्वलय् शुक्रवाः येँय् ग्वसाः ग्वःगु ज्याझ्वःयात सम्बोधन यानादिसें नेता ओलीं उकथं द्वपं बियादीगु खः । वय्कलं माओवादी नायः प्रचण्डं न्हूगु संविधान जारी यायेत स्वयाच्वंथें च्वंसा नं व्यवहारय् अथे यानामच्वंगुलिं क्वःछिनातःगु इलय् संविधान जारी जुइगु खँय् शंका नं प्वंकादिल ।
नेता ओलीं जातियताया आधारय् संघीयताय् वनेमजिउगु धयादिसें क्वःछिनातःगु इलय् संविधान जारी यायेमफइगु जूगुलिं वर्तमान सरकारया औचित्य मदुगु नं स्पष्ट यानादिल ।
