संविधान दयेकेगु ज्याय् ध्यान केन्द्रीत यायेमाःगु : प्रम
मू मू दलया शीर्ष नेतात हे शान्ति व संविधानया ज्या त्वःताः चिचीधंगु पार्टीगत ज्याय् तक्यनाच्वंगुलिं प्रधानमन्त्री डा. बाबुराम भट्टराईं असन्तुष्टि प्वंकादिसें संविधान दयेकेगु ज्याय् ध्यान केन्द्रीत यायेत फुक्क राजनीतिक दलतय्त आह्वान यानादीगु दु ।
सत्य निरुपण नापं मेलमिलाप आयोग, बेपत्ता सम्बन्धि आयोग लिसेंया विषयस कन्हय् स्वंगू दलया मुँज्या च्वनेत्यंगु व कन्हय् हे च्वनीगु सेना समायोजन विशेष समितिया मुँज्यां समायोजनाया ल्यंदनीगु ज्या क्वःछीगु जूगुलिं लिपाया दिनस पूवंक हे संविधान दयेकेगु ज्याय् केन्द्रीत जुइत इनाप नं यानादिल ।
चैत्र २६ गतेनिसें ३० गतेतक फुक्क राजनीतिक पार्टीत दथुइ नियमित व बृहत सहलह यानाः सहमतिइ थ्यंकेगुया विकल्प मदुगु प्रधानमन्त्री डा. भट्टराईं धयादिल । वइगु ३० गते दुने शान्ति प्रकृयायात निष्कर्षय् थ्यंकेगु व संविधान दयेकेगु ज्याय् नं आधारभूत सहमतिइ थ्यंकेगुया विकल्प मदुगु प्रधानमन्त्रीया ठहर जूगु प्रधानमन्त्रीया स्वकीय सचिव विश्वदीप पाण्डें पिथनादीगु प्रेस विज्ञप्तीइ न्ह्यथनातःगु दु ।
