वैद्य पक्षया ज्याखंया हुनिं पार्टी छधी जुयाच्वनेत समस्या : मगर
पर्यटन मन्त्री लोकेन्द्र विष्ट मगरं बैद्य पक्षया घोर अराजक ज्याखंया हुनिं एकीकृत नेकपा (माओवादी) पार्टी छधी जुयाः च्वनेत समस्या ब्वलंगु खँ धयादीगु दु ।
नेपालगञ्जय् शुक्रवाः सुथय् पत्रकारतलिसे खँल्हानादिसें मन्त्री मगरं वैद्य पक्षं अझ नं सशस्त्र युद्धया खँल्हाना दुनियाँयात न्हिकेगु ज्या याःगु धयादिल । माओवादी पोलिटब्यूरो दुजः तकं जुयादीम्ह मन्त्री मगरं वैद्य पक्षं धाःथें नेपालय् जक मखु हलिमय् गन नं ताःमलाइगु धयादिसें यदि अथे सशस्त्र युद्ध जुल धाःसा न्हापां वैद्य पुचः न्हनीगु व लिपा देय् व जनतायात नं समस्या जुइगु धयादिल ।
वय्कलं वैद्य पक्षं अराजक गतिविधि न्ह्याकूसां नं संस्थापन पक्षं धाःसा पार्टी तमज्यायेमा धकाः कडा पलाः मल्ह्वंगु धयादिल ।
मेगु छगू प्रसंगय् मन्त्री मगरं जेठ १४ गते तक संविधान जारी जुइगु व थुगु सरकारं हे लिपा जुइगु चुनाव नं याकीगु दावी तकं यानादिल ।
