झलनाथपाखें शान्ति व संविधानया निंतिं टेलिफोन संवाद
नेकपा (एमाले)या नायः झलनाथ खनालं शान्ति व संविधान निर्माणया निंतिं देय्न्यंकया जिल्लाया राजनीतिक दलया प्रतिनिधि, नागरिक समाजया प्रतिनिधि व बुद्धिजीवीत नाप टेलिफोनपाखें प्रत्यक्ष स्वापुतया जनमत मुंकेगु कथं विचार संवाद न्ह्याकादीगुदु ।
सुझाव कायेगु झ्वलय् दक्लय् न्हापा लमजुङय् टेलिफोन स्वपुतया एमाले लमजुङया नायः जमन्द्रिमान घले, नागरिक समाजया अगुवा बालकृष्ण बराल व बुद्धिजीवी प्रतिनिधि राजेन्द्र बोहोरा नापं सुझाव कयादीगु खः ।
सु्झाव बिइगु झ्वलय् वय्कःपिंसं नायः झलनाथ खनालयात संविधान इलय् हे द्येकेमाःगु व सेना समायोजनय् दुगु विवाद समाधान यायेत भचा लचकता काःसां मपाइगु नापं मिश्रित निर्वाचन प्रणाली व प्रत्यक्ष निर्वाचित प्रधानमन्त्री जुइमाःगु सुझावत बिउगु दु ।
अथेहे संघीयताया विषयलय् पहिचान व सामार्थ्यया आधारय् राज्य पुनर्संरचना यायेमाःगु, अप्व अधिकार प्रदेशयात बिइमाःगु, स्थानीय स्वायत्तता व स्थानीय स्वशासनयात बल्लाकेमाःगु सुझावत बिउगु दु ।
समानुपातिक व समावेशी ढंगं हिमाल, पहाड व तराईवासीपाखें सुझाव कायेगु उद्देश्य कथं नायः खनालं शुक्रवाः सर्लाही व शनिवाः मुस्ताङया राजनीतिक दलया प्रमुख, नागरिक समाज, बुद्धिजिवीत नाप टेलिफोन संवाद यानादीगु खँ खनालया स्वकीय सचिव रामबाबु अधिकारीं कनादिल ।
