लाठीचार्जय् बाबुराम घाःपाः
येँ / (सन्ध्या टाइम्स) राष्ट्रपति डा. रामवरण यादव विरुद्ध संसदय् संकल्प प्रस्ताव तये दयेमाःगु माग यासें माओवादीं थौं सुथय् देय्न्यंकं निघौ सतक जाम यात । थ्व झ्वलय् सुथय् १० निसें १२ बजे तक येँया रत्नपार्कय् माओवादी कार्यकर्तातय्सं लँ पनाः उगु लागाय् यातायात अवरुद्ध याना बिउगु खः । कार्यकर्तातय्सं सुथय् ज्याकू इलय् हे लँ बन्द याना बीवं राजधानीया यातायात करिब स्वघौ अस्त-व्यस्त जूगु खः ।
उखे यातायात बन्दया झ्वलय् माओवादीया सभासद्तय्सं पिकाःगु र् यालीइ प्रहरीं लाठीचार्ज याःबलय् उकी लानाः माओवादीया वरिष्ठ नेता डा। बाबुराम भट्टराई घाःपाः जूगु दु । अथे हे पुलांम्ह मन्त्री गिरिराजमणि पोखरेल नं घाःपाः जूगु दु । र् यालीं सिंहदरवार न्ह्यःनेया निषेधित क्षेत्र प्रवेश यानाः सिंहदरवार न्ह्यःने धर्ना बीगु कुतः यायेवं प्रहरीं लाठीचार्ज याःगु खः । प्रहरी हस्तक्षेप जूसां उगु लागाय् छगू चीधंगु सभा यासें पार्टी प्रवक्ता कृष्णबहादुर महरां न्ववाःगु खः ।
