शान्ति प्रकृया लिपांगु चरणय् : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' शान्ति प्रकृया लिपांगु चरणय् थ्यंगु खँ धयादीगु दु ।
बुधवाः सुथय् संवैधानिक समितिया सभापति निलाम्बर आचार्यलिसे थःगु हे छेँय् नापलानादिसें नायः प्रचण्डं उगु खँ धयादीगु खः । नापं वय्कलं शान्ति प्रकृया लिपांगु चरणय् थ्यंगु व सेना समायोजनया ज्या चैत्र मसान्त दुने हे क्वचाइगु धयादिसें समायोजनया ज्या क्वचायेवं हे संविधान च्वज्यां तिब्रता काइगु जानकारी बियादिल ।
नापलायेगु झ्वलय् सभापति आचार्यं संविधानसभाया ई फुइत आः न्यय्प्यन्हु जक ल्यंदनिगु धयादिसें विवाद जुयाच्वंगु मुद्दाय् याकनं सहमति ब्वलंकेत व संवैधानिक समिति नापं विवाद समाधान उपसमितिया मुँज्याय् शीर्ष नेतातय्गु सहभागिता अप्वयेकेत नं इनाप यानादिल ।
