पत्रकारयात स्याःगुया विरोधय् देय्न्यंक विरोध प्रदर्शन
झापाया पत्रकार यादव पौडेलयात स्याःगु विरोधय् देय्न्यंक पत्रकारतय्सं प्रदर्शन याःगु दु ।
नेपाल पत्रकार महासंघया आह्वानय् बुधवाः स्वनिगः लिसें देय्न्यंक जूगु प्रदर्शनय् पत्रकारतय्सं हत्याय् दुथ्याःपिं दोषीतय्त तत्काल ज्वनाः कारवाही यायेत माग याःगु दु ।
महासंघ केन्द्रीय समितिया ग्वसालय् येँया माइतिघरय् याःगु विरोध प्रदर्शनय् पत्रकार संघसंस्था व नागरिक समाजया प्रतिनिधितय्सं सरकार शान्ति सुरक्षा कायम यायेत ताःमलाःगु धासें कुंखिउगु दु ।
विरोधसभाय् न्ववानादिसें पत्रकार महासंघया मूछ्यांजे ओम शर्मां देशय् दण्डहीनता अप्वया वनाच्वंगु व प्रेस स्वतन्त्रताया अवस्था बांमलना वनाच्वंसां नं सरकारं छुं यायेमफूगु धासें सरकारं दोषीयात कानूनी कठघराय् हयेमफूसा महासंघं अझ सशक्त आन्दोलन यायेगु ख्याच्वः बियादिल। वय्कलं दण्डहीनताय् दुथ्याःम्ह मुख्य अपराधीयात राज्यं छुं यायेमफूगुलिं देशय् हत्या हिंसाया श्रृंखला अप्वया वनाच्वंगु धयादिसें शान्ति सुरक्षा कायम यायेत सरकारलिसे जोरदार माग यानादिल ।
उगु विरोध सभाय् न्ववानादिसें महासंघया पुलांम्ह सभापति तारानाथ दाहालं प्रेस नापं अभिव्यक्ति स्वतन्त्रताया निंतिं राज्यं छुं यायेमफूगु दुःखया खँ जूगु धयादिल । ज्याझ्वलय् पेशागत संजाल पापडया नायः नापं बारया नायः प्रेमबहादुर खड्का, प्रेस चौतारया नायः गगन विष्ट, प्रेस युनियनया मूछ्यांजे शिब लम्साल लिसेंया पत्रकारतय्सं हत्यारायात कानूनी कठघराय् हयेत सरकारलिसे जोरदार माग यात ।
पत्रकार पौडेल एभ्यून्यूज टेलिभिजनया झापा संवाददाता नापं राष्ट्रिय न्हिपौ राजधानीलिसे नं आवद्ध जुयाच्वनादीगु खः । वय्कःयात वंगु चान्हय् अज्ञात मनूतय्सं स्यानाबिउगु खः ।
