स्वक्वःगु सत्यहेरा अनुसन्धान सिरपाः लःल्हात
नेवाः जातिया भाषा, कला, साहित्य, संस्कृति, लिपि आदिया संरक्षण व सम्बद्धन यायेगु तातुनाः नीस्वंगु "सत्यहेरा अनुसन्धान सिरपाः" थौं छगू ज्याझ्वःया दथुइ लःल्हात । नेपालभाषा केन्द्रीय विभाग यलय् जूगु उगु ज्याझ्वलय् मूपाहां नापं वर्ल्ड नेवाः अर्गनाइजेशनया जनसम्पर्क प्रतिनीधि डा. नारायण राजभण्डारीं मय्जु अमीर मैंया रंजित व दिव्या ताम्रकारयात दसिपौ व दाता नापं सिरपाःया संरक्षक उजेली डंगोलं झिद्वः झिद्वः तका लःल्हानादिल । मय्जु रंजितयात "झीगु स्वनिगःया सम्पादकीय" व मय्जु ताम्रकारयात "दिव्यावदान" शोध ग्रन्थयात कयाः उगु सिरपाः लःल्हानादीगु खः ।
अनुसन्धान सिरपाः समितिया नायः प्रा. प्रेमशान्ति तुलाधरया सभाध्यक्षताय् न्ह्याःगु उगु ज्याझ्वलय् मय्जु अमृता महर्जनं च्वयादीगु "म्हय्पि अजिमा:छगू साँस्कृतिक अध्ययन" व राजीत बहादुर श्रेष्ठं च्वयादीगु "अभिलेख" सफू नं मूपाहां डा. नारायण राजभण्डारीं उलेज्या यानादीगु खः । "म्हय्पि अजिमा:छगू साँस्कृतिक अध्ययन" सफू पिथनेगु लागि सत्यहेरा अनुसन्धान सिरपाः समितिपाखें मय्जु उजेली डंगोलं झिद्वः तकाः ग्वाहालि कथं लःल्हानादीगु खः ।
ने.सं. ११३० निसें बियावयाच्वंगु थुगु स्वक्वःगु सिरपाःया लागि थुगुसी मुक्कं १२ गू शोध ग्रन्थत दुहांवःगु खःसा उकियात कयाः प्रा. माणिकलाल श्रेष्ठ व सह प्रा. तुलसीलाल सिंहं मूल्यांकन यानादीगु खः ।
थ्वहे झ्वलय् मूपाहां डा. नारायण राजभण्डारी प्रा. माणिकलाल श्रेष्ठ, सह प्रा. तुलसीलाल सिंह, सिरपाः त्याकादीपिं अमीर मैंया रन्जित, दिब्या ताम्रकार व सफू च्वयादीम्ह मय्जु अमृता महर्जन नं थःथःगु नुगः खँ प्वंकादीगु खः ।
ज्याझ्वलय् पाटन संयुक्त क्याम्पसया क्याम्पस प्रमुख अमन श्रेष्ठ, नेपालभाषा मंकाः खलःया छ्यान्जे नरेशवीर शाक्य, श्रीकण्ठ लाकौल, प्रा. डा. सुन्दरकृष्ण जोशी लिसें आपालं नेपालभाषा ह्यःमिपिनिगु उपस्थिति दुगु खः ।
