शिक्षण अस्पतालया चिकित्सकत आन्दोलित
शिक्षण अस्पताल महाराजगञ्जया चिकित्सकत आन्दोलित जूगु दु । त्रिभुवन विश्वविद्यालय चिकित्साशास्त्र अध्ययन संस्थान व शिक्षण अस्पतालया पदाधिकारीत तत्काल नियुक्ति यायेत दबाव बिइत बुधवाः निसें चिकित्सकतय्सं आन्दोलन न्ह्याकूगु खः ।
चरणवद्ध आन्दोलनया कथं न्ह्याःगु चिकित्सकतय् आन्दोलनया न्हापांगु न्हि बुधवाः सुथय् अस्पतालय् ज्या यायेगु इलय् ल्हातय् हाकुगु पट्टी चिनाः विरोध याःगु खः ।
तर आन्दोलित जुइगु इलय् थःगु पेसागत मर्यादा अःख मवसें बिरामीया स्वास्थ्य परीक्षणय् सचेत जुइगु खँ क्याम्पसया प्राध्यापक संघया अध्यक्ष प्रा. डा. दिनेश पोखरेलं धयादिल ।
चिकित्साशास्त्र अध्ययन संस्थानया डीन व स्वम्ह सहायक डीन नापं क्याम्पस प्रमुख यानाः न्यागू पद ताः ई निसें रिक्त जुयाच्वंगु खः । रिक्त जुयाच्वंगु महत्वपूर्ण पदत वरिष्ठता, योग्यता, इमान्दार व क्षमताया आधारय् प्राध्यापकातपाखें तत्काल नियुक्त यानाः संस्थायात धरासायी जुइकेमबिइत त्रिवि उपकुलपति नापं सरोकारवालायात पटकपटक अनुरोध याःसां बेवास्ता याःगुलिं दवाब स्वरूप चरणवद्ध संघर्ष यायेमाःगु खँ चिकित्सकतय्सं धाःगु दु ।
न्हूगु नियुक्तिया निंतिं लच्छि न्ह्यः हे त्रिवि उपकुलपतिया ध्यानाकर्षण याःसां आःतक नं थःपिनिगु माग पू मवंगुलिं बाध्य जुया विरोधय् कुहांवयेमाःगु खँ डा. पोखरेलं धयादिल ।
