अध्यादेश मार्फत बोक्सी द्वपं सम्बन्धि कसुर व सजाय ऐन
सरकारं बोक्सी द्वपं नापं स्वापु दुगु कसुर व सजाय ऐन अध्यादेश मार्फत ह्येगु तयारी यानाच्वंगु दु । मिसातय्त बोक्सीया द्वपनय् अमानवीय यातना बिइगु ज्या अप्वया वनाच्वंगु इलय् सरकारं अध्यादेश मार्फत कानुन ह्येत्यंगु खः । तत्काल कानुन माःगु इलय् नं व्यवस्थापिका संसदया मुँज्या च्वनेमफयाच्वंगुलिं अध्यादेश मार्फत ऐन ह्येत्यंगु खँ मन्त्रिपरिषदया ज्याकुथीं धाःगु दु ।
सुं नं मनूयात बोक्सो व बोक्सीया द्वपं बिइ मदइगु, द्वपं बिउसाः वा गाली, बेइज्जती, कुटपिट नापं अमानवीय व्यवहार याःसा कानुन कथं दण्डनीय जुइगु व कडा कारबाही यायेगु व्यवस्था प्रस्तावित अध्यादेशया विधेयकय् दुथ्याकातःगु दु । उगु व्यवस्था कथं बोक्सीया द्वपं बिउपिं व अमानवीय व्यवहार याइपिंत दच्छि निसें झिदँ तकया कैद सजायया व्यवस्था व झिद्वः निसें छगू लख तक जरिवाना यायेफइगु खँ दुथ्याकातःगु दु ।
