पुलाम्ह आइजीपी बोहरां भ्रष्टाचार याःगु ठहर
विशेष अदालतं पुलाम्ह प्रहरी महानिरीक्षक मोतिलाल बोहोरां भ्रष्टाचार याःगु ठहर याःगु दु । भ्रष्टाचार यानाः अकुत सम्पत्ति कमे याःगु धासें विशेष अदालतं बोहोरायात डेढ बर्ष कैद सजाय व करिब ५३ लाख ६६ हजार बिगो जरिवानाया फैसला न्यंकूगु दु ।
विशेष अदालतया अध्यक्ष गौरीबहादुर कार्की व दुजःत ओमप्रकाश मिश्र व केदारप्रसाद चालिसेया मंकाः इजलासं मंगलवाः पुलाम्ह आईजीपी बोहोरायात भ्रष्टाचार यानाः अकुत सम्पत्ति कमेयाःगु अभियोगलय् कैद व जरिवानाया फैसला न्यंकूगु खः ।
भ्रष्टाचार निवारण ऐनया दफा २० (२) कथं बोहोरायात डेढ वर्ष कैद नापं जरिवाना व बिगो यानाः ५३ लाख ६६ हजार जरिवानाया निर्णय याःगु खः । अदालतं बोहोराया थीथी बैंकय् दुगु साढे ११ लाख, शेयर लगानी ११ लाख ६० हजार व जग्गा जफत यायेगु निर्देशन नं बिइगु दु ।
बोहोराया २ करोड ३८ लाख रुपैयाँ अवैध खनेदुगु धासें अख्तियार दुरुपयोग अनुसन्धान आयोगं २०६१ साल भदौ १ गते विशेष अदालतय् मुद्दा दायर याःगु खः । थ्वस्वयां न्ह्यः विशेष अदालतं २०६४ साल जेठ १३ गते अदालतया तत्कालीन अध्यक्ष भूपध्वज अधिकारी व दुजःत कोमलनाथ शर्मा व चोलेन्द्रशम्शेर जबराया मंकाः इजलासं हदम्याद पुलेधुंकूगु धासें बोहोरायात सफाई बिइगु खः । लिपा सर्वोच्च अदालतं तत्कालीन प्रधानन्यायाधीश अनुपराज शर्मा समेतया इजलासं भ्रष्टाचारया मुद्दालय् हदम्याद लाइमखु धकाः फैसला यायेधुंकाः बोहोराया मुद्दा हानं विशेष अदालतलय् छ्वःगु खः ।
