जनमोर्चाया बन्द लितकायेत देय् दबूया इनाप
राष्ट्रिय जनमोर्चां संघीयताया विरोध यासें वइगु चैत २७ गते यायेत्यंगु बागमती अञ्चल बन्द लितकायेत नेवाः देय् दबूलिं इनाप याःगु दु ।
देय् दबूया नायः नरेश ताम्राकारं मंगलवाः छगू विज्ञप्ति पिथनाः देय् संघीय व्यवस्थाय् वनीगु सुनिश्चित जुइधुंकूगु व संघीय लोकतान्त्रिक गणतन्त्र नेपाःया संविधान च्वयेगु ज्या अन्तिम अवस्थाय् थ्यंगु इलय् संघीयता विरोधीतय्सं याःगु बन्द प्रति देय् दबूया गम्भीर ध्यान आकर्षण जूगु खँ धयादीगु दु ।
'यगौं निसें लिउने लाकातःपिं आदिवासी जनजाति, दलित, मधेशी, मुस्लिम व अल्पसंख्यकतय् पहिचान व अधिकार सुनिश्चित जुइगु संविधान इलय् हे जारी जुइमाः धइगु सः बुलन्द जुयाच्वंगु इलय् थज्याःगु बन्दया घोर भर्त्सना यानाच्वना' विज्ञप्ति न्ह्यथनातःगु दु ।
