अतिक्रमण बारे भारतलिसे खँ
येँ / (सन्ध्या टाइम्स) भारतं नेपाःया सिमानाय् यानाच्वंगु अतिक्रमण पनेत कुटनीतिक पहल शुरु जुइधुंकूगु खँ प्रधानमन्त्री माधव नेपालं धयादीगु दु । थौं सुथय् थःत ज्ञापनपत्र बीत वंपिं झिंनिगू विद्यार्थी संगठनया प्रतिनिधितलिसे खँ ल्हासें वय्कलं उगु खँ धयादीगु खः ।
वय्कलं नेपाः व भारतया सीमा नाकां नेपाःमि जनता विस्थापित जूगुलिं थः गम्भीर जुयागु खँ धासें सीमा अतिक्रमण सम्बन्धय् भारतीय अधिकारीतलिसे तत्काल संवाद शुरु यायेगु बचं नं बियादिल ।
झिंनिगू विद्यार्थी संगठनतय्सं थौं हे नेपाःस्थित भारतीय राजदूतावासय् नं ज्ञापनपत्र बीत्यंगु दु ।
थ्वहे झ्वलय् भारतीय राजदूतावासं भारतं सीमा अतिक्रमण मयानागु खँ धाःगु दु । नेपाः व भारतया स्वापूयात स्यंकेगु नियतं जक थज्याःगु प्रचार याःगु दावी नं भारतीय दूतावासं याःगु दु ।
