मय्जु ब्यंजनकारया दिव्यरथारोहण
यलया मय्जु मोहनमाया ब्यंजनकारया प्यक्वःगु जंक्व अर्थात दिव्यरथारोहण याःगु दु । ग्वीगुदँ, गुला, गुन्हु, गुघौ व गुपलाः थ्यंगु इलय् वय्कःयात थुकथं दिव्यरथारोहण याःगु खः । यलया च्यासलय् प्यक्वःगु जंक्व यायेगु झ्वलय् थौ सुथसिया ११ ताः जुयाः १२ गू मिनेट निसें १८ गू मिनेटया साइतय् कोंचां पिकयाः न्हू जन्म याःगु खः । थुगु कर्म लिपा मनू हाकनं जन्म जूगु भाःपिउगु खःसा वहे कथं नेवाःया संस्कृति कथं दशकर्मविधि याःगु खः ।
ने.सं. १०३३ दिल्लागा चह्रे कुन्हु मय्जु ब्यंजनकार अबु पूर्णमान व मां तरीमैं ब्यंजनकारया कोखं जन्म जूगु खः । वय्कःया मिखाया सामान्य कमजोरी बाहेक आःतक नं उसाँय् उलिहे बांलानाच्वंगु दु । वय्कलं जीवंकाःछि लाकां न्ह्यानामदीगु खं वय्कःया छेँजःपिन्सं धाःगु दु ।
यलया ज्यापु जाति मध्ये दक्कलय् थकालीम्ह कथं हनातःम्ह मय्जु ब्यंजनकारया प्यंम्ह म्ह्याय् पिं दु ।
