जातिय संगठनतय्सं जेठ १४ दुने संघीयता सहितया संविधान माग
थीथी न्हय्गू जातिय संगठनं जेठ १४ दुने संघीय लोकतान्त्रिक गणतन्त्र नेपाःया न्हुगु संविधान जारी यायेमाःगु माग यासें सभामुख सुभाषचन्द्र नेम्वाङ व संवैधानिक समितिया सभापति निलाम्बर आचार्यायात ज्ञापनपौ लःल्हात ।
नेवाः देय् दबू लगायत प्रमुख न्हय्गू जातिय संगठनया प्रतिनिधितय्गु ल्हाःचि दुगु उगु ज्ञापनपौ बुधवाः नेम्वाङ व आचार्ययात लःल्हाःगु खः । ज्ञापनपौ लःल्हासें जातिय संगठनया प्रतिनिधितय्सं पहिचानयात प्रमुख आधार दयेकाः निर्माण याःगु संघीयता व सामर्थ्ययात साहक आधार दयेके माःगु व आत्मनिर्णयया अधिकार संविधानय्
सुनिश्चित यायेमाःगु, आदिवासी जनजातिया बाहुल्य प्रदेशय् अग्राधिकार नापं स्वायत्त स्वसासित संरचनाया सुनिश्चित यायेमाःगु, अल्पसंख्यक आदिवासी जनजाति लगायत मेंपिं उत्पीडिनलय् लाःपिं समुदायतय्त अग्राधिकार नापं स्वायत्त क्षेत्र, संरक्षित क्षेत्र व विशेष क्षेत्र
सुनिश्चित यायेमाःगु माग याःगु दु ।
अथेहे जातीय ल्याःया आधारय् पूर्ण समानुपातिक निर्वाचन प्रणाली सुनिश्चित यायेमाःगु व प्राकृतिक स्रोत साधान (जल, जंगल, जमिन)य् आदिवासीपिंनिगु अधिकार सुनिश्चित यायेमाःगु मागत ज्ञापनपौपित दुथ्याकातःगु दु ।
ज्ञापनपौ नेवाः देय् दबू नापं नेपाल मगर संघ, किरात याक्थुङ, किरात राई यायोक्खा, नेपाल तामाङ घेदुङ, थारु कल्याणकारिणी सभा व यूल छोंजधीं गुरु्ङ राष्ट्रिय परिषदं बिउगु खः ।
