सच्छि वंगु नोटय् लुम्बिनी व असोक स्तम्भया किपा
नेपाल राष्ट्र बैंकं सच्छि वंगु नोटय् गौतम बुद्धया जन्मस्थल लुम्बिनी व असोक स्तम्भया किपा तयेगु निर्णय याःगु दु । भारतं गौतम बुद्ध भारतय्
बुगु धकाः भ्रमं जाःगु हल्ला यानाः कपिलवस्तु थेंजाःगु भूमि द्येकाच्वगुं जुयाः बुद्धया जन्मभूमि नेपाः देय् खः धंकाः प्रचारप्रसार यायेत नेपाल राष्ट्र बैंकं अज्याःगु निर्णय याःगु खः । बुद्धया जन्मभूमि लुम्बिनी धकाः प्रचार प्रसार यायेगु कथं आः सच्छि वंगु नोटय् लुम्बिनीः द बर्थ प्लेस अफ लर्ड बुद्ध धंकाः च्वइगु खँ धाःगु दु ।
नेपाल राष्ट्र बैंकं छापे यायेत्यगु नोटय् थज्याःगु किपा तयेगु प्रस्ताव द्येकाः बैंकं अर्थ मन्त्रालयय् छ्वःगु दु । अर्थ मन्त्रालयं उगु प्रस्तावयात मन्त्रिपरिसदय् यंकाः स्वीकृत यायेधुंकाः नोट छापे यायेगु ज्या न्ह्याइ ।
मन्त्रिपरिषद् याकनं निर्णय याःसा खुलाया दुने लुम्बिनीया किपा दुगु नोट बजारय् वइगु धाःगु दु । गर्भनरया ल्हाःचिं दुगु च्वसंया खाली थासय् अंग्रेजी भासां 'लुम्बिनी : द बर्थ प्लेस अफ लर्ड बुद्ध' च्वयेगु प्रस्ताव यानातःगु खँ राष्ट्र बैंकं धाःगु दु ।
लुम्बिनी व असोक स्तम्भया किपा तयेगु निर्णय याःसां गौतम बुद्धया हे किपा धाःसा नोट मतइगु खँ धाःगु दु । गौतम बुद्धया किपा थीथी आकारप्रकारया दुगु व किपाय् एकरुपता मदुगुलिं तयेत समस्या वःगु खः । नापं नोटय् बिक्रम सम्बत् व ईस्वी सम्वत् कथं निष्काशनया मिति नं मतइगु जूगु दु ।
