सितिं वंगु ज्वलंपाखें ब्वसा ज्वलं
येँ / (सन्ध्या टाइम्स) नघल युवा समूहया ग्वसालय् सिितं वंगु थीथी सामग्रीपाखें ब्वसा ज्वलं दयेकाः प्रदर्शन याःगु दु । म्हिगःनिसें थनया थाय्मरु उगु ब्वज्या शुरु जूगु खः । थ्वयां न्ह्यः नं नघल युवा समूहपाखें सितिंवंगु सामग्रीपाखें उपयोगी ज्वलंत दयेकाः तःकःमछि ब्वज्या यायेधुंकूगु दु । २८ वडाया स्थानीय मिसातय्त संस्थां थुकथंया तालिम बियाः आत्मनिर्भर याना वयाच्वंगु दु ।
स्वन्हु तक न्ह्याइगु उगु ब्वज्याया न्हापांगु दिं म्हिगः हे आपालं ज्वलं मीगु ज्या जूगु दु । प्रशिक्षक दिलशोभा तुलाधरया कथं आः तक थज्याःगु तालिमय् स्थानीय चय्म्ह मिस्तय्सं तालिम कयाः सामग्री दयेके सयेकेधुंकूगु दु ।
झिंच्यागू स्टल दुगु उगु ब्वज्याय् अचार पाउँ प्लाष्टिकया म्हिचा सु व प्लाष्टिकया लाकां थीथी प्लाष्टिक व सिितं वनेत्यंगु सामग्रीं दयेकातःगु ज्वलं ब्वयातःगु दु । न्याये व मीगु ज्या नं जुयाच्वंगु ब्वज्याय् मिस्तय्सं जक दयेकूगु सामग्रीत नं ब्वयातःगु खः । अन नीन्याम्ह स्वयां अप्वः बांलाक थज्याःगु ज्वलं दयेकेसःपिं मनूतय्सं तयार यानातःगु सामग्रीया ब्वज्या यानातःगु दु ।
ब्वज्या आपालं विद्यार्थी व सर्वसाधारण मनूतय्सं नं स्वः वयाच्वंगु दुसा उमित समूहया दुजःतय्सं ज्वलंया महत्व बारे थुइकेगु ज्या याःगु खः ।
