पहिचान सहितया राज्य पुनर्संरचना निंतिं ज्ञापनपौ
थीथी न्हय्गू जातिय संगठनतय्सं पहिचान सहितया राज्य पुनर्संरचना जुइमाःगु माग यासें प्रमुख प्यंगू राजनीतिक शक्तितय्त ज्ञापनपौ लःल्हात ।
नेवाः देय् दबू लगायत प्रमुख न्हय्गू जातिय संगठनया प्रतिनिधितय्सं मोटरसाइकल र्याली सहित माओवादी, कांग्रेस, एमाले व मधेशी मोर्चाया ज्याकूथी वनाः शुक्रवाः ज्ञापनपौ लःल्हाःगु खः ।
ज्ञापनपौ लःल्हासें जातिय संगठनया प्रतिनिधितय्सं लिप्पांगु इलय् मन्त्री लिसें सभासद् व नेतातय्सं पहिचान सहितया संघीयता व छुंछुं नेतातय्सं अझ संघीयताया हे विरोध याःगु प्रति आपत्ति प्वंकूसें पहिचान सहितया संघीयता मवसाः थःपिंसं कडा संघर्ष यायेगु ख्याच्वः बिउगु खः ।
जातिय संगठनतय्सं ज्ञापनपौ माओवादी अध्यक्ष पुष्पकमल दाहाल 'प्रचण्ड', कांग्रेस उपसभापित चित्रलेखा यादव, एमाले सचिव युवराज ज्ञवाली व मधेशी मोर्चाया प्रमानन्द मेहतायात लःल्हाःगु खः ।
ज्ञापनपौ नेवाः देय् दबू नापं नेपाल मगर संघ, किरात याक्थुङ, किरात राई यायोक्खा, नेपाल तामाङ घेदुङ, थारु कल्याणकारिणी सभा व यूल छोंजधीं गुरु्ङ राष्ट्रिय परिषदं बिउगु खः ।
