वैद्य पक्षं चिधंगु दलतनाप जानाः आन्दोलनया घोषणा
एनेकपा माओवादी मोहन वैद्य पक्षं जनसंविधानया निंतिं थीथी चिधंगु पार्टीनाप मंकाः आन्दोलन याइगु जूगु दु । थीथी १२गू चिधंगु पार्टीनाप संयुक्त राष्ट्रिय जनआन्दोलन समिति नीस्वनाः उगु आन्दोलन यायेत्यंगु खः । आन्दोलनं जनसंविधान निर्माणयात मू विषय दयेकूगु व पहिचान सहित राज्य पुनर्संरचनायात नं प्रमुख मुद्दा दयेकूगु खँ धाःगु दु ।
चिधंगु गठबन्धन दलतनापं यायेत्यगु थुगु आन्दोलनं २४० निर्वाचन क्षेत्रलय् ल्हाःचि अभियान यायेगु , विशेष भित्तेलेखन याःगु, दक्व संविधानसभाया दुजःतय्त जनताया संघीय, लोकतान्त्रिक, गणतन्त्रात्मक संविधानया पक्षलय् दनेत अपील यासें ज्ञापनपौं लःल्हायेगु नापं थीथी ज्याझ्वःत घोषणा याःगु दु ।
माओवादी सचिव सिपी गजुरेल संयोजक जुयादीगु थुगु समितिइ मातृका यादव, चिरन पुन, पर्शुराम तामाङ, राजकुमार लेखी, डा. ललन चौधरी, सुरेश आले मगर लगायत नेतात दुजः कथं च्वनादीगु दु ।
अथेहे समितिं राष्ट्रिय स्वाधिनताया विषय ल्वंसें असमान सन्धि च्याकेगु व राष्ट्रिय प्रतिरोध दिवस कथं न्याकेगु, दक्वं निर्वाचन क्षेत्रलय् जनगोष्ठी यायेगु, राष्ट्रघात, महङ्गी, भ्रष्टाचार, कालाबजारी, हत्या, हिंसा, बलात्कार, अपहरण विरुद्ध मसाल जुलुस पिथनेगु व संविधान सभा दुने व पिने विरोध प्रदर्शन यायेगु घोषणा याःगु दु । समिति थःपिनिगु आन्दोलनया बारे शुक्रवाः छगू पत्रकार सम्मेलन यानाः जानकारी बिउगु खः ।
