राजनीतिक विवादं विकास ठप्प
येँ / (सन्ध्या टाइम्स) पर्सा जिल्लाय् राजनीतिक कार्यकर्तातय् दथुइ ब्वलंगु विवादया कारण गाउँ विकास परिषद्या बैठक तकं च्वने मफयाः विकास बजेट हे निकासा जुइ मफुगु खँ सीदुगु दु । आर्थिक दँ फुइत्ययेकाः नं विकास बजेट निकासा जुइ मफयेवं विकास निर्माणया ज्या ठप्प जुयाच्वंगु दु ।
सरकारं प्रत्येक गाविसयात १५ निसें २१ लाख तका बजेट स्थानीय विकास मन्त्रालयपाखें निकासा याःसां नं पर्साया जयमंगलपुर भिखमपु घोडदौडा पिररा मुर्ली महादेवपटी घोरे मधुवन व मथवल गाविसय् ध्यबा निकास जुइ मफुनि । राजनीतिक पार्टीया दथुइ ब्वलंगु विवादया कारणं गुलिखे गाविसं बैंकय् खाता तकं चायेके मफुनिगु खँ सीदुगु दु ।
उखे बजेट निकासा जूगु छुं छुं गाविसय् नं आर्थिक नियम विपरित खर्च यानाच्वंगु दुसा गुलिखे गाविसय् धाःसा राजनीतिक पार्टीतय्सं हे बजेट भागबन्डा यानाः खर्च यानाच्वंगु खँ सीदुगु दु ।
