थीथी साहित्यकारपाखें महाकवि गिरिजाप्रसादया कविता वाचन
नेपालभाषाया महाकवि गिरिजाप्रसाद जोशीया ७४क्वःगु बुन्हिया लसताय् वय्कःया चिनाखँ ब्वनेज्याझ्वः जुल ।
महाकवि गिरिजाप्रसादया किपायात सभापति दयेकाः येँया पर्यटन बोर्डय् जूगु ज्याझ्वलय् नेपालभाषाया थीथी कवि-कवयित्रीतपिंसं कविता वाचन यानादीगु खः । गजलकार भुषणप्रसाद श्रेष्ठं महाकविया 'हाकुगुँया न्हापांम्ह गायक' चिनाखँ ब्वना न्ह्याःगु चिनाखँ ब्वनेगु ज्याझ्वलय् भगतदास श्रेष्ठ, सुदन खुसः, रिमा बज्राचार्य, रश्मी नापित, केदार सितु, सुरजवीर बज्राचार्य, शशिकला मानन्धर, सुरेश किरण, केशरमान ताम्राकार, राजभाई जकःसमि, शरद कसाः आदिपिंसं कविता वाचन यानादीगु खः ।
महकवि गिरिजाप्रसाद ७४क्वःगु बुन्हि हना ग्वसाः खलःया ग्वसालय् जूगु ज्याझ्वलय् साहित्यकार फनिन्द्ररत्न बज्राचार्यं महाकविया खण्डकाव्य 'बुद्ध नुगः'या छुं असं ब्वनादीगु खःसा किरण साय्मि, महन्तलाल मल्ल व रामकृष्ण ढुवालं महाकविं च्वयादीगु म्ये हाला न्यंकादीगु खः ।
ज्याझ्वःयात ग्वसाःखलःया दुजः रमेशकाजि स्थापितं लसकुस यानादीगु खःसा महाकविनापया लुमन्ति बारे वरिष्ठ साहित्यकारपिं रामशेखर नकःमि व मथुरा साय्मिं थःगु नुगः खँ तयादीगु खः । ज्याझ्वलय ग्वसाःखलःया छ्याञ्जे नारद बज्राचार्यं सुभाय् देछानादीगु खः ।
