थौं नेपालभाषाया महाकवि गिरिजाप्रसादया ७४क्वःगु बुन्हि

थौं चिल्लागा द्ववादशी अर्थात बहुमुखी प्रतिभां जाःम्ह नेपालभाषाया महाकवि गिरिजाप्रसाद जोशीया बुन्हि । ने.सं १०५९य् जन्म जुयादीम्ह जोशीया थौं ७४क्वःगु बुन्हि खः । अल्सर ल्वचं कायाः ने.स. ११०७ येँयाः पुन्हि कुन्हु मदुम्ह महाकविं थःगु जिन्दगी हे नेपालभाषा साहित्य सिर्जना यायेगु ज्याय् फुकादीगु खः ।

ने.सं १०७८य् थःगु साहित्यिक यात्रा सुरु यानादीम्ह जोशीं बाखँ, उपन्यास, खण्डकाव्य, महाकाव्य परम्परा, कविता, म्ये, गजल आदि यक्व विधा च्वयादीगु दु । वय्कलं च्वयादीगु उपन्यास, खण्डकाव्य, महाकाव्य परम्परा, प्रचलन व लागायात हाचां गायेत सफल जुया नेपालभाषा साहित्यय् छगू न्हूगु मोड हःगु दावी विद्वान समालोचकतय्सं यायेगु याः ।

वय्कलं च्वयादीगु 'सिलुस्वां' व 'विपात्र' तकसं चर्चित उपन्यास खःसा 'हाकुगुँया न्हापांम्ह गायक' नांया गद्य कविता आःतक पिदंगु नेपालभाभाया गद्य कविताय् दकलय् ताहाकःगु कविता खः । 'सून्य' कवितां थःगु साहित्यिक यात्रा न्ह्याकादीम्ह जोशीं थःगु जीवनजःछि गुंगू कविता सफू, स्वंगू म्ये सफू, निगू खण्डकाव्य, छगू बाखँ सफू, झिगू उपन्यास सफू, निगू प्याखँ सफू, छगू गजल सफू, छगू कमिक सफू व छगू भिडियो फिल्म पिदनादीगु खः ।

वय्कःया अझ नं आपालं सफू पिदने ल्यँ दनी । महाकवि गिरिजाप्रसादया पिदने मनिगु सफूया धल थुकथं दु :
ल्वहंमा (महाकाव्य)
हेल्चा (खण्डकाव्य)
म्ये जिगु : छंगु मतिना (म्ये)
जिगू जन्म (ताहाः कविता)
थीथी पत्रपत्रिकाय् दिनाच्वंगु कविता, गजल, म्ये, व्याकरण सम्बन्धि च्वसु, समालोचना आदि ।