रक्षा मन्त्रीया असंवैधानिक बिचाः

रक्षा मन्त्री नियुक्त जुइधुंकाः मय्जु विद्या भण्डारीं थौंकन्हय् गुगु अभिव्यक्ति बीगु यानाच्वन थुकिं देशय् न्ह्यानाच्वंगु शान्ति प्रक्रिया तकं धरापय् लाइगु जकं मखु ला धइगु न्ह्यसः ब्वलंका बिउगु दु ।

वंगु छुं न्हि न्ह्यः जक रक्षा मन्त्री भण्डारीं सेना समायोजन बारे साचार माध्यमय् न्ववासें थम्हं समायोजन धइगु खँ हे मसिउगु व माओवादी सेनायात समायोजन यायेगु मखु चाहे जुल धाःसा छेँय् छेँय् लित छ्वयेत सरकारं ग्वाहालि याइगु खँ धयादीगु दु । थुकिं यानाः गनं माओवादी व वर्तमान सरकारया दथुइ हाकनं छकः द्वन्द्व ब्वलनीगु जकं मखु ला धइगु न्ह्यसः थन पिहां वःगु दु ।

खतुं २०६२/६३ लिपा दयेकूगु अन्तरिम संविधानय् माओवादीया जनसेनायात तत्कालिन शाही नेपाली सेना वा थौंया राष्ट्रिय सेनाय् समायोजन यायेगु खँ स्पष्ट रुपं च्वयातःगु दु । अले रक्षा मन्त्री जुयाच्वंम्हेस्यां हे संविधानया अःखः न्ववायेगु उचित जुइ सुनां संविधानयात पालना याये फइ मखु वा याइ मखु अज्याःम्ह व्यक्तियात राज्यया गुगुं नं पदय् तया तयेगु पाय्छि नं जुइ मखु । संविधानय् च्वयातःगु खँयात पालना याये मखु धइगु रक्षा मन्त्रीया उगु अभिव्यक्तिं देशय् न्ह्यानाच्वंगु शान्ति प्रक्रियायात प्रभावित यानाः हानं छक्वः अराजकता ब्वनीगु खतरा वयेफु ।

अथे हे मय्जु भण्डारीं पुलांगु सरकारं पनातःगु च्याम्ह जर्नेलतय् बढुवा नं आः फुकुवा यायेगु खँ धयादीगु दु । जर्नेलतय् थ्व बढुवा प्रकरण आः सर्वोच्च अदालत थ्यनाच्वंगु कारणं उकी सुनां नं थी मजिउ । तर रक्षा मन्त्रीं उकियात नं वास्ता याना मदी । थ्व गनं म्वद्वँ मखंम्हेस्यां जाकिद्वँ खंगुया लिच्वः जकं मखु ला ?

More Stories Like this