थीथी जातिय संगठनतय्सं पहिचान मबीगु षड्यन्त्रया भर्त्सना
नेवाः देय् दबू लगायत थीथी जातिय संघ संस्थातय्सं उत्पीडित जनाताया पहिचान हुइगु षड्यन्त्र जुयाच्वंगु धासें उकीया भर्त्सना याःगु दु । सरकारया उच्च मन्त्रीत नापं नेतातय्सं आदिवासी जनजाति, मधेशी व दलित समुदाययात अधिकार बिइमफइगु धासें न्ववानाच्वंगु व उमिसं थःगु पहिचान जक ल्यंकाः मेपिंनिगु पहिचान मबिइगु कुत यानाच्वंगु धासें उकीया भर्त्सना याःगु दु ।
नेवाः देय् दबू नापं नेपाल मगर संघ, किरात याक्थुङ, किरात राई यायोक्खा, नेपाल तामाङ घेदुङ, थारु कल्याणकारिणी सभा व यूल छोंजधीं गुरु्ङ राष्ट्रिय परिषदं बिहीवाः छगू मंकाः विज्ञप्ति पिथना भर्त्सना याःगु खः ।
पहिचान व सामर्थ्यया आधारय् संघिय राज्य जुसाः जक जातीय व वर्गीय उत्पीडनया माग संबोधन जुइगु खँ विज्ञप्तिइ न्ह्यःथनातःगु दु । न्हय्गू संघ सस्थातं राज्य पुनर्संरचना उच्चस्तरीय सुझाव आयोगया दुई तिहाइ बहुमतं लःल्हाःगु प्रतिवेदनया विरुद्ध सरकारया मन्त्रीत व नेतातय्सं षड्यन्त्र यानाच्वंगु धासें उकीया नं भर्त्सना याःगु दु ।
अथेहे २०६९ साल जेठ १४ दुने पहिचान नापं दुथ्याःगु संघीय लोकतान्त्रिक गणतन्त्र नेपाःया न्हूगु संविधान घोषणा यायेत माग यासें राज्य पुनर्संरचना यायेगु इलय् पहिचानयात न्हापांगु आधार कथं कायेत सुझाव नं बिउगु दु । उकथं हे विश्व मानवअधिकार घोषणापत्र, आइ. एल. ओ. १६९ व संयुक्त राष्ट्र संघीय आदिवासी विश्व घोषणापत्रं न्ह्यथनातःगु आत्मनिर्णया अधिकार, आदिवासी जनजातितय्गु बाहुल्या क्षेत्र वा प्रदेशलय् अग्राधिकार नापं दुथ्याःगु स्वायत्त स्वशासित संरचना नं संविधानय् सुनिश्चित यायेत माग याःगु दु ।
अथेहे अल्पसंख्याय् दुगु दक्व आदिवासी जनजाति व मेमेंपिं उत्पीडनय् लाःपिं समुदायपिनिगु अग्राधिकार नापं दुथ्याःगु स्वायत्त स्वशासित संरचना (स्वायत्र क्षेत्र संरक्षित क्षेत्र विशेष क्षेत्रत) संविधानय् सुनिश्चितता, जातीय जनसंख्याया आधारं पूर्ण समानुपातिक निर्वाचन प्रणालीया सुनिश्चितता व अन्तर्राष्ट्रिय कानूनं बिइगु प्राकृतिक स्रोत साधन (लः, जंगल व जमिन)य् आदिवासी जनजातितय्गु अधिकार संविधानय् सुनिश्चितताया नं माग याःगु दु ।
