संवैधानिक समितिइ प्रमया अभिव्यक्ति -'जितः ज्या याके मबिल'
संविधानसभाया ई फुइगु तिथि न्ह्यःने वयाच्वंगु इलय् नं दलत दथुइ संविधानया विवादित विषयसं सहमति चूलाकेगु ज्याय् अझ नं प्रगति जुइफूगु मदुनि । बैठकय् च्वनेगु तर सहलहसं धाःसा छु नं प्रगति जुइमफइगु झ्वः न्ह्यानाः हे च्वंगु दु ।
थ्वहे दथुइ संवैधानिक समिति अन्तर्गतया संवैधानिक समितिया आइतवाः च्वंगु बैठकय् नं दलत दथुइ छु नं विषयसं सहमति जुइमफुत । बैठकय् संविधान च्वयेगु सम्बन्धय् न्हापा ल्यँ दुगु व गुलिखय् सहमतिइ थ्यनेधुंकूगु विषयसं नापं सहलह न्ह्यःने न्ह्यायेमफुत ।
बैठकय् मू स्वंगू दलया नेतात, प्रधानमन्त्री व समितिया दुजःतपाखें थःत जूगु खँत प्वंकेगु बाहेक मेगू सहलह जुइमफुत । नेपाली कांग्रेस संसदीय दलया नेता लिसे उपसभापति रामचन्द्र पौडेलं बैठकय् फुक्कसिन थःथःगु खँ तःगु जानकारी बियादिल । वय्कलं सहलह न्ह्यानाच्वंगुलिं मेगू बैठक थ्वहे फागुन ३० गते च्वनेगु जानकारी नापं बियादिल ।
नेकपा (एमाले)या नेता भीम रावलं संविधान च्वयेगु बारे न्हापा ल्यँ दुगु व गुलिखय् सहमतिइ थ्यनेधुंकूगु विषयत नापं सहलहसं दुहांवने मफुगु जानकारी बियादिल । वय्कलं धयादिल, 'बैठकय् दलया नेतापिं, प्रधानमन्त्री व दुजःपाखें थःत जूगु खँ मुक्त मनं न्ह्यःब्वयेगु बाहेक मेगु छु नं मजू ।
बैठकय् नेतातय्सं संविधान च्वयेगु बारे विवादित विषयसं सहमति चूलाकेगु सम्बन्धय् छु नं प्रगति मजूगु व सहलह न्ह्यानाच्वंगु जानकारी ब्यूगु खः । तर प्रधानमन्त्री डा. बाबुराम भट्टराईं धाःसा थःत ज्या याके मबिउगु व थौंकन्हय् स्थिति भयावह जुजुं वनाच्वंगु धयादीगु दु ।
'थौंया बैठकय् प्रधानमन्त्रीं इतिहासं जिगु मूल्याङ्कन याइ, जितः ज्या याके मबिल तर स्थिति भयावह दु धकाः भचा पीडा व ख्याच्वलं जाःगु मिश्रित अभिव्यक्ति बियादिल' प्रधानमन्त्रीया धापू न्ह्यथंसें नेता रावल ।
'थःथःगु खँत जक धायेगु, देय्या प्रधानमन्त्री जुइगु, शीर्ष तहलय् च्वनेगु, देशय् भयावह स्थिति दु धायेगु तर भयावह चीकेत छु यायेमाः धकाः छु नं मधायेगु, यदि थज्याःगु हे तरिका खःसा जेठ १४ गतेय् संविधान दयेके फइमखु, नेता रावलं धयादिल ।
कांग्रेस उपसभापति पौडेलं नं संविधान सभालिपाया प्रधानमन्त्रीइ डा. भट्टराई थें हे भाग्यमानी प्रधानमन्त्री सु नं मदुगु धयादिसें, तर नं प्रधानमन्त्रीं घुर्की क्यनेगु सरासर गलत जूगु बिचाः तयादीगु खः ।
'न्हापां प्रधानमन्त्री पद त्वःति, अले शान्ति प्रक्रिया व संविधान न्ह्यःने न्ह्याके, न्हापां सहमतिया सरकार दयेके व संविधानया ज्या न्ह्यःने न्ह्याके, न्हापां जिगु नेतृत्वय् सरकार दयेकी अले संविधान दयेके धइगु सः आःया प्रधानमन्त्रीया पालय् मवः, उकिं वय्कः थेंज्याःम्ह भाग्यमानी प्रधानमन्त्रीं गुगु घुर्की क्यनादीगु दु थ्व सरासर गलत खः' नेता पौडेलं धयादिल ।
राष्ट्रिय जनशक्ति पार्टीया नेता डा. प्रकाशचन्द्र लोहनीं नं मू स्वंगू दलया नेतातय्सं निगू-निगू मिनेट जक न्ववाना छु नं यायेमफुगु व ज्याय् प्रगति जुइमफुगु धयादिल । चिधंगु दलतय्सं आः संविधान च्वयेगु ज्या न्ह्यःने न्ह्याकेत दवाब मूलक भूमिका म्हितिगु नं डा. लोहनीं जानकारी बियादिल ।
