न्हय्गू बुँदे सहमति कथं सेना समायोजन यायेमाः : देउवा

नेपाली कांग्रेसया वरिष्ठ नेता नापं पुलांम्ह प्रधानमन्त्री शेरबहादुर देउवां न्हय्गू बुँदे सहमति कथं सेना समायोजन यायेमाःगु खँ धयादीगु दु ।

विराटनगर विमानस्थलय् थौं सञ्चारकःमिपिंलिसे खँल्हाबंल्हा यानादिसें देउवां न्हय्गू बुँदे सहमतिइ सेना समायोजनया स्पष्ट मापदण्ड निर्धारण न्ह्यःथनातःगु धयादिल । देउवां माओवादी नेतात दथुइ सहमतिइ ल्हाःचि तयेगु तर कार्यान्वयन मयायेगु ल्वय् दुगु हुनिं देशय् समस्या सृजना जूगु द्वपं नं बियादिल ।

माओवादीया असहयोगया हुनिं जेठ १४ गते दुने संविधान च्वयेगु व शान्ति प्रक्रिया क्वचायेकेगु ज्याय् पंगः जुयाच्वंगु द्वपं बियादिसें देउवां क्वःछिनातःगु इलय् हे संविधान च्वयेगु व शान्ति प्रक्रिया क्वःमचासाः न्हूगु चुनावय् वनेगुया विकल्प मदुगु धयादिल ।