जलविद्युत आयोजनाया सम्झौता कानुन सम्मत जूगु दाबी
ऊर्जामन्त्री पोष्टबहादुर बोगटीं पश्चिम सेती जलविद्युत आयोजनाया ज्या क्वचायेकेत याःगु सम्झौता कानुन सम्मत जूगु दाबी यानादीगु दु ।
संसदया प्राकृतिक श्रोत साधन समितिं उगु आयोजना क्वचायेकेगु निंतिं याःगु सहमति ऐन कानुन अःखः जूगु न्ह्यःथंसें ज्या दिकेत उजं ब्यूसां नं मन्त्री बोगटीं धाःसा सम्झौता कानुन सम्मत जूगु दाबी यानादीगु खः ।
क्रान्तिकारी पत्रकार संघं थौं दाङ्गया घोराहीसं याःगु पत्रकार सम्मेलनय् न्ववानादिसें वय्कलं पश्चिम जलविद्युत आयोजनाया सम्झौता ऐन कानुन अःखः वनाः याःगु मजुसें कानुन सम्मत हे दुगु दाबी यानादिल ।
म्हिगःया प्राकृतिक श्रोत साधन समितिया बैठकय् मन्त्री बोगटी व ऊर्जा छ्याञ्जें सम्झौताया बारे सकारात्मक लिसः मबीवं चीनया थ्री गर्जेज कम्पनीलिसे याःगु सेती जलविद्युत आयोजनाया सम्झौता ऐन कानुन अःखः जूगु न्ह्यःथना झिन्हुतक्कया निंतिं ज्या दिकेत उजं ब्यूगु खः ।
अथेहे ज्याझ्वलय् मन्त्री विष्टं लोडसेडिङ्ग म्हो यायेत सरकारं गृहकार्य न्ह्याकाच्वंगु न्ह्यःथनादिल । न्हापाया तुलनाय् लोडसेडिङ्गया ई आपालं क्वपाले धुंकूगु धयादिसें वय्कलं आः याकनं हे लोडसेडिङ्गया ई न्हिं खुघौलय् क्वःकायेगु नापं धयादिल ।
