संवैधानिक संयन्त्रया रुपय् राष्ट्रिय सुरक्षा परिषद्
प्रधानमन्त्री डा. बाबुराम भट्टराईं संवैधानिक संयन्त्रया रुपय् राष्ट्रिय सुरक्षा परिषद् जुइमाःगु धयादीगु दु ।
राष्ट्रिय सुरक्षा परिषद् सचिवालयया झिंछक्वःगु वार्षिकोत्सव ज्याझ्वलय् न्ववानादिसें प्रधानमन्त्री डा. भट्टराईं देय्यात जटिल परिस्थितिपाखें निकास बीगु सन्दर्भय् माःगु राय सुझाव बीफूगु वैधानिक संयन्त्रया रुपय् राष्ट्रिय सुरक्षा परिषद् जुइमाःगु धयादिल । वय्कलं न्हूगु दयेकीगु संविधानय् राष्ट्रिय सुरक्षा परिषद्या संरचना व कार्यदेशयात परिमार्जनलिसे दुथ्याकेगुपाखे थःगु कुतः जुयाच्वनीगु धयादिल ।
प्रधानमन्त्री डा. भट्टराईं विश्वन्यंक हे राष्ट्रिय सुरक्षाया मामिलाय् न्हू न्हूगु अवधारणा वयाच्वंगु न्ह्यःथनादिसें राष्ट्रिय सुरक्षाया अवधारणाय् राष्ट्रं छ्यलीगु बृहत् राष्ट्रिय सुरक्षाया विषय दुथ्याइगु न्ह्यःथनादिल ।
वि.सं. २०५८ फागुन २७ गते सचिवालयया पलिस्था जूगु खः । अन्तरिम संविधान २०६३ कथं प्रधानमन्त्रीया नायःसुइ रक्षामन्त्री लिसें गृहमन्त्री नापं दुजः जुइगु व मन्त्री परिषद्य् दुगु राजनीतिक दलत मध्ये ब्यागलं ब्यागलं दलया प्रतिनिधित्व जुइकथं प्रधानमन्त्रीं क्वःछिउपिं मेमेपिं स्वम्ह मन्त्री दुजः जुइगु व्यवस्था दु ।
ज्याझ्वलय् उपप्रधानमन्त्री, गृहमन्त्री लिसे रक्षामन्त्री विजयकुमार गच्छदार, भौतिक योजना लिसे निर्माणमन्त्री हृदयेश त्रिपाठी, मू छ्याञ्जे, रक्षा छ्याञ्जे, प्रधान सेनापति, सुरक्षा अङ्गया उच्च अधिकारी लगायतपिनिगु ब्वति दुगु खः ।
