'सम्पत्ति छानबिन यायेत सरकारी निकायतय्सं आवश्यक ग्वहालि मयाः'
पुलाम्ह जुजु व जुजुया छेँजःया सम्पत्ति छानबिन यायेत नीस्वंगु नेपाल ट्रष्टं सरकारी निकायतय्सं माःगु ग्वहालि मयाःगुलिं बांलाक ज्या यायेमफुगु खँ धाःगु दु ।
नेपाल ट्रष्टया प्रवक्ता पुरुषोत्तम पौडेलं मालपोत ज्याकूया कर्मचारीतय्सं माःगु कथं ग्वाहालि मयाःगु व आलटाल यायेगु प्रवृत्तिं यानाः बिचाः याःगु कथं सफलता मजूगु धयादिल ।
अथेहे ट्रष्टं पुलाम्ह जुजुया व छेँजःया जग्गा व मेमेगु भौतिक सम्पत्तिया बारे पत्ता लगेयाःगु दु । बालाजुया १२३ रोपनी, कमलादीया ३ रोपनी, नुवाकोटया थानसिंह बगैचाया ६६ रोपनी व पोखराया रत्नमन्दिर परिसरया ६३ रोपनी जग्गा गु कथं छ्यलेगु धइगु बारे विकल्प अध्ययन यानाः गुरुयोजना तयार याःगु दु ।
नापं ताहाचल, सोल्टीमोड, ख्वपः, हेटौडाया भवन व जग्गात भाडालय् बिइगु निंतिं डिजाइन द्येकेत परामर्शदाता नियुक्त याःगु दु । नेपाल सरकारया निर्णय कथं गोकर्णया ११७९ रोपनी जग्गा नेपाल ट्रष्टया नांम्हे लालपूर्जा द्येकाः भवन द्येकेगु तयारी जुयाच्वगु दु ।
