भोजपुरा राज्य समितिं प्रचण्डया ज्याझ्वः बहिष्कार
एकीकृत नेकपा (माओवादी)या नायः पुष्पकमल दाहाल 'प्रचण्ड'यात थःगु हे पार्टीया भोजपुरा राज्य समितिया दुजःतय्सं बहिष्कार याःगु दु । नायः प्रचण्डयात माओवादीया न्वकू मोहन वैद्य पक्षया कार्यकर्तातय्सं बहिष्कार याःगु खः ।
सुवर्णपुर पर्सा च्वंगु सहिद स्तम्भ सिलान्यास यायेत अन थ्यंकादीम्ह प्रचण्डयात वैद्य पक्षधरतय्सं बहिष्कार याःगु खः । वैद्य पक्षधरया नेतातय्सं थःपिंत राज्य समितिया ज्याकू छ्यले मबउगु व जिल्ला समितिया जिम्मेवारी मबिइगुलिं नायःयात बहिष्कार याःगु अनुमान याःगु दु ।
ज्याझ्वलय् ब्वति कायेत झाःम्ह प्रचण्डयात सिमराया विमानस्थलय् वैद्य पक्षया नेता व कार्यकर्तातय्सं हाकूगु ध्वाँय् क्यनेगु ज्याझ्वः धाःसा स्थगित याःगु खः । हाकूगु ध्वाँय् क्येनेगु ज्याझ्वः स्थगित यानाः प्रचण्डं ब्वति काइगु ज्याझ्वः हे बहिष्कार यायेगु निर्णय याःगु जानकारी वैद्य पक्षधर छम्ह नेतां बिउगु दु ।
उगु हे ज्याझ्वलय् न्वकू वैद्यं नं ब्वति काइगु ज्याझ्वः दुगु खःसां थःगु पक्षया नेतातय्त जिम्मेवारी मबिउगुलिं वैद्यं नं उगु ज्याझ्वलय् ब्वति कयामदी ।
