बबरमहलय् बम विष्फोट याःपिं सावर्जनिक
येँया बबरमहलय् वंगु सोमवाः स्वम्ह मनूया ज्यान वंकः जूगु बम विष्फोटनया खुम्ह आरोपीतय्त प्रहरी्र सार्वजनिक याःगु दु ।
महानगरीय प्रहरी आयुक्तया ज्याकूथी आइतवाः याःगु छगू पत्रकार सम्मेलनय् प्रहरीं खुम्ह आरोपितय्त सावर्जनिक याःगु खः । प्रहरीं भीमबहादुर तामाङ, निमा तामाङ, बुद्धिबहादुर गोले, प्रेम तामाङ, सुरेश लामा व सागर लामायात सार्वजनिक याःगु खः ।
बम विष्फोटया मू योजनाकार देवराज लामा धाःसा अझ फरार जुयाच्वंगु खँ प्रहरीं धाःगु दु । प्रहरीया कथं निमा तामाङ, भीमबहादुर तामाङ व बुद्धिबहादुर गोलें विष्फोटया योजना दयेकूगु व बम विष्फोट यायेगु थाय् ल्यःगु खःसा प्रेम तामाङ, सागर लामा व सुरेश लामां घटनास्थलय् बम तःगु खः ।
प्रहरीं आरोपीतय्सं स्वनिगःया मेमेगू थासय् नं बम विष्फोट यायेत तयातःगु सामान येँया सिनामंगलया छगू कोठां बरामद याःगु दु । उगु कोठां जिलेटिन लगायत बम दयेकेत उपयोग जुइगु थीथी सामान बरामद याःगु खः ।
बम विष्फोटय् लानाः कृष्णा तामाङ, मानबहादुर तामाङ व वीरबहादुर तामाङ सीगु खःसा मेपिं न्हय्म्ह घाःपाः जूगु खः ।
