मेट्रो एफएमया आन्दोलन स्थगित
मेट्रो एफएमया पत्रकारतय्सं याना वयाच्वंगु आन्दोलन आःया निंतिं स्थगित जूगु दु। आइतवाः येँ महानगरपालिका व एफएमया पत्रकारत दथुइ जूगु वार्ता सकारात्मक जूगुलिं नेपाल पत्रकार महासंघ मेट्रो एफएम प्रतिष्ठान संघर्ष समितिपाखें न्ह्याका वयाच्वंगु आन्दोलन नं आःयात स्थगित याःगु दु ।
महानगरपालिकां वंगु फागुण ५ गते पिथंगु स्टेशन म्यानेजरया विज्ञापन कार्यान्वयन मयायेत मनपा प्रमुख कार्यकारी अधिकृत सिफारिस यायेगु व पत्रकारतय्सं घोषणा यानातःगु संघर्षया ज्याझ्वः नं स्थगित यायेगु निर्णय जूगु संघर्ष समितिया कजि राजु लामां कनादीगु दु ।
लिसें मेट्रो एफएमया पत्रकारतय्त स्थायी यायेमाः धकाः याना वयाच्वंगु माग व समग्र एफएम सुधारया सम्बन्धय् वइगु झिन्हुया दुने प्रतिवेदन पेस यायेगु कथं छगू समिति नं गठन याःगु दु ।
