कारवाही लित कायेत गच्छदारया इनाप
थौं तिनि मधेशी जनअधिकार फोरमया कारवाहीलय् लानादिम्ह उपप्रधानमन्त्री विजयकुमार गच्छदारं केन्द्रीय समितिया बैठक मच्वंसे याःगु कारवाही तत्काल लित कायेत माग याःगु दु ।
अध्यक्ष उपेन्द्र यादवं याःगु पत्रकार सम्मेलन धुकां वयेकलं शुक्रवाः सनिलय् पत्रकार सम्मेलन यानाः थम्हं फोरमयात विभाजन जुइगु पाखें बचे यायेगु दावी यानादिल । वयेकलं थःयात कारवाही याःगु खँ संचारमाध्यम पाखें जक स्यूगु धासें छुं नेतात जक च्वनाः याःगु निर्णय तत्काल लित कायेत इनाप यानादिल ।
महाधिवेशनया ईलय् हे विभाजन जुइत्यंगु पार्टी थम्हं बचे यानाःगु दावी यानादिसें मन्त्री गच्छदारं थः सरकारय् ब्वति कयाः थ्वस्वयां न्ह्यः जूगु सहमति व सम्झौता कार्यान्वयन याकीगु प्रतिबद्धता प्वंकादिल ।
म्हिग तिनि सरकारया मंकाः न्युनतम ज्याझ्वःलय् हस्ताक्षर यानाः थौं सरकारयात ब्यूगु समर्थन लित काये मज्यूगु धासें वयेकलं स्वीनिम्ह सभासदतय्सं याःगु हस्ताक्षर लित मकाइगु दावी यानादिल ।
