न्हूगु संविधानय् बहिष्कृत समुदायया मुद्दा बारे संवाद
जातिय विभेद विरुद्ध राष्ट्रिय मञ्च (एनकार्ड)या ग्वसालय् बहिकरणय् लाःपिं समुदायया मुद्दा व न्हूगु संविधाना बारे विवेचनात्मक संवाद ज्याझ्वः जुल ।
निन्हु तक न्ह्याःगु संवाद ज्याझ्वलय् राजनीतिक विश्लेषक श्याम श्रेष्ठं संविधानसभाया विषयगत समितिं तयार याःगु प्रतिवेदनया बांलागु पक्ष व अन समावेश जुइमफुगु पक्षया बारे तयार यानादीगु कार्यपत्र न्ह्यब्वयादीगु खः ।
संविधानसभाय् झिगू विषयगत समिति दुसां बहिकरणय् लाःपिं समुदायया मुद्दा खुगू समितिया विषय नाप जक आवद्ध जूगुलिं श्रेष्ठं खुगू विषयगत समितिया प्रतिवेदनया बारे समिक्षा यानादीगु खः । वय्कलं संविधानय् बहिष्करणय् लाःपिं समुदायया पहिचान, पहुँच व प्रतिनिधित्व गुकथं न्यायपूर्ण व समतामूलक ढंगं स्थापित यायेफइ धइगु खँ न्ह्यब्वयादीगु खः ।
एनकार्डं न्ह्याकाच्वंगु समावेशी संविधानया निंतिं संवाद अभिवृद्धि परियोजनाया संयोजक रजनी महर्जनं न्ह्याकादीगु ज्याझ्वलय् एनकार्डया महासचिव मल्ल के. सुन्दरं ज्याझ्वःया उदेश्या बारे प्रस्ट यानादीगु खः । विश्लेषक श्रेष्ठं थुगु परियोजना अन्तर्गत थीथी पक्षनाप सहलह लिपा उगु प्रस्तुति न्ह्यब्वयादीगु खः । वय्कलं यानादीगु समिक्षायात सफू कथं उगु हे ज्याझ्वः मार्फत उलेज्या याःगु खः । ज्याझ्वः एनकार्डया अध्यक्ष सुमित्रा मानन्धर गुरुङया अध्यक्षताय् न्ह्याःगु खः ।
धौख्यया मिरावेल रिसोर्टय् निन्हुन्यंक जूगु ज्याझ्वलय् सभासद्त ब्रिन्दा पाण्डे, सीता गुरुङ, आङदावा शेर्पा, ईन्द्रजित राई, गोपल ठाकुर लगायतया ब्वति दुगु खः । अथेहे थीथी ख्यःया पेशाकर्मी व आपालं पत्रकारतय् नं ब्वति दुगु खः ।
