बम विष्फोट बारे छानबिन यायेत समिति गठन
प्रहरी प्रधान ज्याकूथीं विष्फोटया घटनाबारे छानबिन यायेत नेपाल प्रहरीया केन्द्रीय अनुसन्धान ब्यूरो प्रमुख डिआईजी उपेन्द्रकान्त अर्यालया संयोजकत्वय् छानबिन समिति गठन याःगु दु । समितिइ एसएसपीत केदरसिंह भण्डारी व देवेन्द्र सुवेदी व एसपी सुवोध घिमिरे दुजः कथं दी ।
थ्वहे दथुइ विष्फोट सुनां याकूगु बारे अझ नं सीकेमफुनी ।
भूमिगत पुचः संयुक्त जातीय मुक्ति मोर्चां नेपाल आयल निगमया गेट न्ह्यःने जूगु बम विष्फोटया जिम्मेवारी काःसां उगु हे संगठनया महासचिव मुक्तिदातां उगु घटनाय् थःपिनिगु ल्हाः मदुगु स्पष्ट याःगु दु ।
थ्वस्वयां न्ह्यः देवराज लामा धाःम्ह विश्व क्रान्तिं थः मोर्चाया प्रवक्त जूगु धासें थीथी संचार माध्यमयात फोन यानाः बम विष्फोट याकाःगु दावी यासें घटनाया जिम्मेवारी काःगु खः । विश्व क्रान्तिं सरकारं पेट्रोलम पदार्थय् भाः थकानाः जनतायात मारय् लाकेगु व अभाव याकेगु कुतः याःगुलिं सरकारयात ख्याच्वः कथं विष्फोट याकूगु खँ न्ह्यथंगु खः ।
तर लिपा संगठनं छगू विज्ञप्ति पिथना मोर्चायात बदनाम यायेत ब्रम्हावादीतय्सं उगु ज्या याकूगु धासें आपत्ति प्वंकूगु दु । संगठनं उगु घटनाय् संगठनया छुं नं निर्देशन व योजना मदुगु स्पष्ट याःगु दु ।
