आयल निगम भवन न्ह्यःने बम विष्फोट स्वम्ह सित
येँया बबरमहलसं च्वंगु नेपाल आयल निगमको गेट न्ह्यःने बम विष्फोट जुयाः निम्ह मनूत घटनास्थल व छम्ह वीर अस्पतालय् सीगु दुसा मेमेपिं खुम्ह मनूत घाःपाः जूगु दु । विष्फोटय् लानाः धादिङ बैरेनी १या ३५दँया कृष्णबहादुर तामाङ व मानबहादुर तामाङ सीगु खः । मेम्ह छम्हेसिया धाःसा सनाखत जुइमफुनी ।
घटनाय् लानाः घाःपाः जूपिंत थनया वीर अस्पतालय् वासः जुयाच्वंगु प्रहरीं जानकारी बिउगु दुसा घटनाया बारे प्रहरीं अनुसन्धान यानाच्वंगु खँ धाःगु दु । घटनास्थल जःखः थ्व इलय् आपालं ल्याखय् प्रहरीतय्त छ्यलातःगु दु ।
करिब सवा १ बजे जूगु उगु विष्फोटया तःसःगु सलं सिंहदरबारतक्क तायेदुगु खः । विष्फोट जूगुया बाघौलिपा येँया एसपी राजेन्द्र श्रेष्ठ घटनास्थल थ्यंगु खः । वय्कः थ्यंगु इलय् छम्ह मिसा व छम्ह मिजंया सीम्ह लुयावःगु खःसा विष्फोट जुयाः पार्किङ्ग यानातःगु मोटर साईकलय् क्षति जूगु दु ।
