कांग्रेस व एमाले दथुइया बैठक बिना निष्कर्ष क्वचाल
कांग्रेस व एमाले दथुइ मन्त्रालय् भागबन्डा यायेत च्वंगु बैठक बिना निष्कर्ष क्वचाःगु दु ।
शुक्रवाः एमालेया पार्टी ज्याकू बल्खुइ जूगु खँल्हाबंलाय् निगुलिं दलं थःगु अडान मत्वतेवं बैठकं छुं निष्कर्ष पिकायेमफूगु खः । बैठकय् कांग्रेस पाखें विमलेन्द्र निधी व कृष्ण सिटौलां ब्वति काःगु खसाः एमालेया पाखें महासचिव ईश्वर पोखरेल, सचिव शंखर पोखरेल व प्रधानमन्त्रीया सल्लाकार रघुजी पंन्त ब्वति काःगु दु ।
बैठकय् कांग्रेसं परराष्ट्र बाहेक स्थानीय विकास, जलस्रोत, श्रम व यातायात, शान्ति व पुन निर्माण मन्त्रालय थःगु पार्टीयात बीमाःगु अडान काःगु खसाः एमालें गृह, अर्थ, संचार व जलस्रोत मखुसा स्थानीय विकास मन्त्रालयलय् अडान काःगु खः ।
कांग्रेसं धासाः गृह व अर्थ एमालेया बीत तयार जुसां स्थानीय व जलस्रोत मन्त्रालय बीमफइगु खँ धाःगु दु । प्रधानमन्त्रीया सल्लाहकार रघुजी पन्तं चीचीधंगु पार्टी नाप सहलह यानाः जक मन्त्रालय् भागबन्डाया निर्णय जुइगु धयादिल ।
