संघ उपनायक भिक्षु कुमार काश्यप मंत
संघ उपनायक भिक्षु कुमार काश्यप महास्थविर आइतवाः न्हिन्य् ८५दँया वैश्यय् मंत । ताः ई न्ह्यःनिसें जलासेँ सम्बन्धी ल्वचं ग्रस्त जुयाच्वंम्ह वसपोल काश्यप वासः वाकाच्वंगु इलय् थनया काठमाडौं मोडल अस्पतालय् मदुगु खः । अस्पतालं वसपोल आइतवाः न्हिनसिया १:०५ बजे मदुगु घोषणा याःगु खः ।
आनन्दकुटी विहारया प्रमुख जुयादीम्ह वसपोलं नेपालभाषां आपालं कृति च्वयाबिज्याःगु दु । वसपोलयात 'भाषाथुवाः' उपाधिपाखें विभूषित यानातःगु दु । नेपाःया थेरवादी बुद्ध धर्म धिसिलाकेगु ज्याय् तःधंगु योगदान यानादीम्ह वसपोल वि.सं. १९८३स तानसेन पाल्पाय् जन्म जूगु खः । बुद्ध धर्मया मुख्य ग्रन्थ त्रिपिटक कण्ठ वःम्ह जुयाः वसपोलयात त्रिपिटकाचार्य उपाधिं छाय् पियातःगु दु।
वसपोलया अन्तिम संस्कार सोमवाः व मंगलवाः आनन्दकुटी विहारय् याइगु ग्वसाः दुसाः आइतवाः वसपोलया शवयात बुद्ध विहारय् तयातःगु दु ।
