गच्छदार पार्टीपाखें निष्कासित
मधेशी जनअधिकार फोरमं संसदीय दलया नेता विजयकुमार गच्छदारयात पार्टीं निष्कासन याःगु दु । पार्टी अध्यक्ष उपेन्द्र यादवं शुक्रवाः पत्रकार सम्मेलन यानाः गच्छदार नापं न्ह्यम्ह नेतात्यत पार्टीं निष्कासन याःगु दु । गच्छदार नापं शरदिसंह भण्डारी, जितेन्द्र देव, रामेश्वर राय, रामजन चौधरी, उपेन्द्र झा व रन्तेश्वर गोइतयाट पार्टीं कारवाही याःगु दु । अथेहे गच्छदारयात समर्थन याईपं स्वीनिम्ह सभासदतय्त नं पार्टीइ लिहां वयेत इनाप याःगु दु ।
पत्रकार सम्मेलनय् अध्यक्ष यादवं सरकारयात याःगु समर्थन लित कयाः संसदय् प्रतिपक्षय् च्वनीगु नं धयादिल । नापं माधव नेपालया सरकारं फोरम विभाजन यायेगु अभियानय् लगेजूगु धासें सरकार विरुद्ध आन्दोलन यायेगु घोषणा तकं याःगु दु । अन्दोलनया कथं २५ गते मधेश बन्द यायेगु जानकारी बियादिल ।
कांग्रेस व एमालेया गठबन्धन नाप खँ जुयाच्वंगु ईलय् दुथुइ हे सद्भावना व तमलोपां समर्थन यानाः तःधंगु गल्ति याःगु खँ अध्यक्ष यादवं धयादिल । निगू पार्टीं फोरमयात न्यंहे मन्यंसें एमाले नेतृत्वया सरकारयात समर्थन याःगु द्वंप वयेकलं बियादिल ।
थ्व सरकार गठन यायेत फोरम यात विभाजन मयासें मगाःगुलिं एमाले व कांग्रेसं गच्छदारयात थुकीया विरुद्ध ब्वकूगु धासें यादवं विजयकुमार गच्छदार न्हापां लिसें हे पार्टी विभाजन यायेत स्वयाच्वंगु द्वपं बियादिल ।
गच्छदारं पार्टी दुने थःत थ्व पद माल व माल धकाः न्हापां लिसें अवसरवादी चरित्र क्यनाच्वंगु व पार्टीया नीति विपरित ज्या याःगुलिं वयेकयात कारवाही यायेगु जानकारी अध्यक्ष यादवं बियादिल ।
