नेवाः राज्यया निंतिं नेवाः सभासद्तय् भूमिका बारे बिचाः गोष्ठी
नेवाः देय् दबूया ग्वसालय् नेवाः स्वायत्त राज्य व नेवाःतय् अधिकारया निंतिं नेवाः सभासद्तय् भूमिका बारे छगू बिचाः गोष्ठी जुल ।
येँया गणेश पार्टि प्यालेसय् जूगु उगु ज्याझ्वलय् नेवाः सभासद्तय्सं नेवाः राज्य जातिय राज्य मखसें पहिचानया आधार कथं नीस्वनीगु राज्य जूगु न्ह्यथंगु खः । २५० दँ निसें खस-ब्रम्हुतय्सं जक शासन याःगुलिं उगु इलय् धाःसा जातिय राज्य जूगु तर्क नं सभासद्तय्सं यानादिल ।
सभासद्तय्सं खस-ब्रम्हुतय्सं थःगु पहिचान जक ल्यंकाः मेगू जाति समुदायया पहिचान धाःसा न्हंकाः छ्वयेगु षड्यन्त्र यानाच्वंगु न्ह्यथंसें थःगु एकल राज्ययात निरन्तता बिइत हे इमिसं राज्य पुनर्संरचनाय् षड्यन्त्र यानाच्वंगु बिचाः प्वंकूगु खः ।
ज्याझ्वःया सभापति नापं नेवाः देय् दबूया नायः नरेश ताम्राकारं संविधानसभाय् स्वीनिम्ह नेवाः सभासद्त दुगु धकाः गर्व यानाः जक मगाःगु धयादिल । वय्कलं सभासदतय्सं नेवाः राज्य प्राप्तिया निंतिं थःगु भूमिका छु जुइमा धकाः थुइका पलाः ल्ह्वनेमाःगु न्ह्यःथनादिल ।
ज्याझ्वलय् सभासद्त तिर्थराम डंगोल, मंगलसिद्धि मान्नधर, हिसिला यमि, सिला कतिला, राजकाजी महर्जन, सुरेश आले मगर नापं नेवाः न्ह्यलुवाः मल्ल के. सुन्दर व मोहन कृष्ण डंगोल नं थःगु नुगः खँ प्वंकादीगु खः ।
