संचारमन्त्री गुप्तायात डेढ वर्ष कैद / ८४ लख जरिवाना
सर्वोच्च अदालतं संचारमन्त्री जयप्रकाश प्रसाद गुप्तां भ्रष्टाचार याःगु ठहर याःगु दु । अदालतं मन्त्री गुप्तायात डेढ वर्ष कैद व ८४ लख ९ हजार २८ विगो सहित जरिवना पुइकेत आदेश बिउगु दु । २०६४ साल कात्तिक २२ गते निसें सर्वोच्चय् विचारधीन दुगु मुद्दाय् न्यायाधीशद्वय सुशीला कार्की व कर्तराज भट्टं गुप्ताया सम्पतिया स्रोत खुले मजूगु ठहर यासें उगु फैसला न्यंकूगु खः ।
फैसला न्यंकेवं गुप्तां इजलास समक्ष आत्मसमपर्ण यासें सजायलय् २० प्रतिशत मिनाह यायेत निवेदन दायर यानादीगु खः । इजलासय् हे सजाय मिनाहया निवेदन दर्ता याःसा कैद व जरिवानाय् २० प्रतिशन मिनाह जुइगु कानुनी प्रावधान दु ।
गुप्ता तत्कालनी प्रधानमन्त्री गिरिजाप्रसाद कोइरालाया प्रेस सल्लाहाकार, संचार व कृषि मन्त्री जुयादीधुंकल । सर्वोच्चया फैसला नापं वय्कः स्वतः मन्त्री व सभासद् पदपाखें मुक्त जुयादीगु दु ।
गुप्तायात भ्रष्टाचारया अभियोगय् २०६० सलाय् विशेष अदालतय् मुद्दा दायर याःगु खःसा विशेष अदालतं प्रमाण मगाःगु धासें सफाइ बिउगु खः । लिपा अख्तियारं २०६४सालय् सर्वोच्चय् मुद्दा दायर याःगु खः ।
