थौं अन्तर्राष्ट्रिय मातृभाषा दिवस
थौं २१ फेबुअरी अन्तर्राष्ट्रिय मातृभाषा दिवस । नेपाः लगायत हलिंन्यंक थीथी ज्याझ्वः यानाः थुगु दिवस हनाच्वंगु दु । 'मातृभासं शिक्षा व समावेशीय शिक्षा' धइगु नारा सहित झिंस्वक्वःगु मातृभाषा दिवस हंगु खः । युनेस्केया बैठकं सन् १९९९य् मां भाय्, बहुल संस्कृति व बहुभाषाया शंरक्षण यायेगु ताःतुना २१ फेबुअरी कुन्हु मातृभाषा दिवस हनीगु निर्णय याःगु खः ।
थ्वहे झ्वलय् अन्तर्राष्ट्रिय मातृभाषा दिवसया लसताय् नेपालय् मातृभाषा कविता महोत्सवया ग्वसाःग्वल । राष्ट्रपति डा. रामवरण यादवं उलेज्या यानादीगु उगु महोत्सवय् नेपाःया थीथी ३७गू भासं कविता बाचन याःगु खः ।
नेपाल प्रज्ञा प्रतिष्ठान व आदिवासी जनजाति उत्थान राष्ट्रिय प्रतिष्ठानं मंकाः कथं ग्वसाःग्वःगु उगु ज्याझ्वःया उलेज्या यानादिसें राष्ट्रपति यादवं झीगु थःगु संस्कृति व भाय्यात जगेर्ना यानाः विश्व बजारय् नं दुहांवनेमाःगु आवश्यकता दुगु धयादिल । वय्कलं बहुलता दुने हे एकता व थःगु संस्कृति व मान्यता प्रतिया प्रतिबद्धता दथुइ सहिष्णुता हे राष्ट्रिय अस्तित्वया जग जूगु न्ह्यःथनादिल ।
