शासकीय स्वरुपया जिम्मा शीर्ष नेतातय्त
शासकीय स्वरुपया बारे सहमति यायेगु जिम्मा शीर्ष नेतातय् थाय् थ्यंगु दु । ताः ई तक नं संविधानसभाया विवाद समाधान उपसमितिं उकी सहमति यायेमफेवं शीर्ष नेतातय्त जिम्मा बिइगु निर्णय याःगु खः । वइगु फागुन ११ गते च्वनीगु शीर्ष नेतातय्सं शासकीय स्परुपया बारे सहलह याइगु ज्याझ्वः दु । सोमवाः सुथय् च्वंगु विवाद समाधान उपसमितिया मुँज्यां शासकीय स्वरुपया बारे प्रमुख स्वंगू दलया शीर्ष नेतातय्सं हे यायेमाःगु निर्णय याःगु खः ।
राजनीतिक दलतय्सं शासकीय स्वरुपया बारे थःपिं सहमति नापं थ्यंगु धाःसां अझ नं सहमति जुइमफुनी । विवाद समाधान उपसमितिइ लक्ष्मणलाल कर्ण नेतृत्वया कार्यदलं राष्ट्रपति व प्रधानमन्त्री निगूलिं व्यवस्था दुगु फ्रेन्च मोडलया सुझाव बिउगु खः ।
