झिंच्यागू राजनीतिक दलया खारेजी प्रक्रिया न्ह्याकेगु ख्याच्वः
निर्वाचन आयोगं खर्चया विवरण मबिउगु झिंच्यागू राजनीतिक दलया खारेजी प्रक्रिया न्ह्याकेगु ख्याच्वः बिउगु दु । आयोगं शुक्रवाः छगू पत्रकार सम्मेलन यानाः खर्च विवरण बुझेयात आलटाल यानाच्वंगु झिंच्यागू राजनीतिक दलया खारेजी प्रक्रिया न्ह्याकीगु जानकारी बिउगु खः ।
आयोगं यदि न्हय्न्हुया दुने नं खर्च विवरण बुझेयात अटेर याःसा दलया दर्ता खारेजी प्रकिया न्ह्याकेगु ख्याच्वः बिउगु दु । खर्च विवरण बुझे यायेत अटेर यानाच्वगु झिंच्यागू राजनीतिक दलत संविधानसभाय् सहभागी मदुगु आयोगं खँ धाःगु दु ।
एकीकृत (माओवादी), नेकपा (एमालें) इलय् हे खर्च विवरण बुझे याःगु व नेपाली कांग्रेस, नेकपा (माले) व मेमेगू छुं छुं दलंतय्सं ई फुइधुंका जक खर्चया विवरण आयोगय् बुझेयाःगु आयोगया आयुक्त निलकण्ठ उप्रेतिं कनादिल ।
राजनीतिक दलया ऐन २०५८या दफा १२ कथं आर्थिक दँ क्वचाःगु खुला दुने वार्षिक प्रतिवेदन पेस यायेमाःगु उल्लेख दु ।
