तत्कालया निंतिं नेपाः कालोसूचीपाखें बचेजुल
नेपालय् न्ह्यानाच्वंगु संक्रमणकालीन अवस्थाया हुनिं तत्कालया निंतिं नेपाः वित्तिय रुपय् कालोसूचीया धलखय् लाइगु पाखें बचेजूगु दु । शुक्रवाः पेरिसय् न्ह्याःगु वित्तिय कारवाही कार्यदलया मुँज्यां तत्काल नेपाःयात यथास्थितिइ तयेगु निर्णय याःगु खः ।
नेपाःया अस्थिर राजनीतिक अवस्थाया हुनिं सम्पति सुद्धिकरण निवारण सम्बन्धी कानुन निर्माण जुइमफुगु प्रति कार्यदल सकारात्मक खनेदुगु व नेपाःया संक्रमणकालीन राजनीतिक अवस्थायात स्वयाः कार्यदलं तत्काल नेपाःयात कालोसूचीइ मतयेगु निर्णय याःगु खः । कालोसूची दुमथ्याकेत नेपाः सरकारं कुटनीतिक लबिङ तकं याःगु खः ।
उखे कालोसूची दक्षिण एसियाया पाकिस्तान, श्रीलंका नापं थाइल्याण्ड, इन्डोनेसिया, म्यानमार, टर्की, क्युबा, बोलिभिया, साओ टोमे एण्ड प्रिन्सिपे, इथियोपिया, घाना, केन्या, नाइजेरिया, सिरिया व तान्जानिया लाःगु दु ।
