नेवाः भासं आखः ब्वंकेत ज्ञापनपौ
नेवाः मस्तय्तसं नेवाः भासं हे आखः ब्वने दयेमाःगु माग यासें नेवाः देय् दबूलिं शिक्षा मन्त्री दिनानाथ शर्मायात छगू ज्ञापनपौ लःल्हात । देय् दबूया नायः नरेश ताम्राकारया नेतृत्वय् वंगु छगू प्रतिनिधिमण्डलं थःगु मां भासं ब्वने दइगु मस्तय् नौसर्गिक अधिकार जूगु न्ह्यथंसें उगु ज्ञापनपौ लःल्हाःगु खः । ज्ञापनपतिइ नेवाः भासं ब्वनेगु पाठ्यक्रम याकनं दयेकाः दुथ्याकेत माग यानातःगु दु ।
ज्ञापनपौ लःल्हाना कयादिसें मन्त्री शर्मां मां भासं आखः ब्वंकेगु बारे सहलह जुयाच्वंगु इलय् थःपिनिगु ध्यान सालेगु ज्या याःगुलिं सुभाय् बियादिसें ज्ञापनपौपति दुथ्याःगु माग पूवंकेगु बचं बियादिल ।
उगु प्रतिनिधिमण्डलय् देय् दबूया संरक्षक मल्ल के. सुन्दर, दांभारी विजय वज्राचार्य, प्रो. प्रेमशान्ति तुलाधर, दिपक तुलाधर, रमिता वज्राचार्य, सानु महर्जन लगायतया ब्वति दुगु खः ।
