माओवादी पाखें देयन्यंक प्रदर्शन
एकीकृत नेकपा (माओवादीं) राष्ट्रपतिया पलाः विरुद्ध संसदय् दर्ता याकूगु संकल्प प्रस्तावयात सभामुखं संसदय् सहलह मयाकूगु व थीथी जिल्लाय् जूगु सीमा अतिक्रमणया विरोधय् प्रदर्शन याःगु दु ।
माओवादीं शुक्रवाः देयन्यंक जुलुस प्रशर्दन यासें निघौ तक चक्का जाम याःगु दु । येँय् जूगु प्रदर्शनय् माओवादीया वरिष्ठ नेतातय्सं ब्वति काःगु खः । रत्नपार्कं न्ह्याःगु उगु प्रदर्शनय् लिपाः प्रहरी बल प्रयोग यावलय् माओवादी वरिष्ठ नेता डा. बाबुराम भट्टराई नापं छुं माओवादी सभासद्त घाःपाः जूगु दु । सिंहदरवार जःखः तयातःगु निषेधित क्षेत्र पाखे वनेत्यंगु ईलय् प्रहरीं पद्मोदय मोडय् हस्तक्षेप याःगु खः ।
जुलुस लिपाः जूगु कोणसभायात संम्बोधन यानादिसें माओवादी नेता कृष्णबहादुर महरां स्वाधीनताय् घाः लाकीगु कथं जूगु सीमा अतिक्रमणया खँय् नेपामित सुम्क मच्वनीगु धयादिल । वयेकलं थुकीया बारे भारत नाप याकनं कुटनीतिक पहल यायेत सरकार नाप माग नं यानादिल ।
